د امریکا د بهرنیو چارو وزارت د اوکراین په پلازمېنه کییف کې د خپل سفارت د تړلو اعلان وکړ. په ورته وخت کې د ایټالیا او هسپانیې هېوادونو اعلان کړی چې په اوکراین کې د دغو دوو هېوادونو سفارتونه د امنیتي دلایلو له کبله خدمات نه وړاندې کوي.

آوا: د رویټرز خبري آژانس د خبر له مخې، د امریکا د بهرنیو چارو وزارت په یوه خبرپاڼه کې ویلي، چې په کییف کې د امریکا پر سفارت د چهارشنبې په ورځ د یوه پراخ هوايي برید په اړه معلومات ترلاسه شوي او له مخې به یې وتړل شي.
په یوه بیان کې چې په کییف کې د امریکا د سفارت په ویب پاڼه کې خپره شوې، وزارت ویلي: سفارت به وتړل شي او کارمندانو ته به لارښوونه وشي چې په خوندي ځای کې پناه واخلي.
په همدې حال کې د EFE خبري اژانس د راپور له مخې، د اوکراین په پلازمېنه کې د هسپانیا سفارت د امریکا د سفارت د تړلو له اعلان وروسته اعلان وکړ چې د احتمالي امنیتي ګواښونو له امله به د ورځې په اوږدو کې خدمات نه وړاندې کوي.
د Viaggiare Sicuri پورټل هم راپور ورکړی چې په کییف کې د ایټالیا سفارت به د توغندیو د ګواښ له امله د متحده ایالاتو او هسپانیې د ډیپلوماتیکو ماموریتونو په تعقیب وتړل شي.