د افغانستان د کرکټ د ۱۹ کلنو ملي لوبډلې په متحده عربي اماراتو کې د درې اړخیزو سیالیو په لړ کې په خپله لومړۍ لوبه کې د پاکستان لوبډلې ته په ۱۰۰ منډو ماتې ورکړه.

آوا: دغه لوبه د جمعې په ورځ (د عقرب ۲۵مه) په متحده عربي اماراتو کې ترسره شوه.

د افغانستان کرېکټ ځوانانو لومړی توپ وهنه پیل کړه او په ۵۰ اورونو کې یې د خپلو ۸ لوبغاړو په سوځېدو سره ۳۰۶ منډې جوړې کړې.

د افغانستان د کرکټ د ۱۹ کلنو لوبډلې پاکستان ته ۳۰۷ منډې هدف وټاکه، خو د دغه هېواد لوبغاړي یوازې ۲۰۶ منډې جوړې کړې.

د افغانستان د کرکټ د ۱۹ کلنو ملي لوبډله به د دوشنبې په ورځ په دې سیالیو کې خپله راتلونکې لوبه له متحده عربي اماراتو سره وکړي.

دا سیالۍ د متحده عربي اماراتو په کوربه توب د افغانستان، پاکستان او متحده عربي اماراتو د ۱۹ کلنو لوبډلو ترمنځ ترسره کېږي.