آوا - کابل: د کورنیو چارو وزارت ویاند عبدالمتین قانع په یوه خبرپاڼه کې دغه راپور په کلکه رد کړی او له حقیقت څخه لرې ګڼی.

 

نوموړی وايي، ښايي دا راپور د اسلامي امارت د پولیسو له لوري د کوکنارو د کښت د له منځه وړلو په موخه د روان کال په لومړیو کې چمتو شوی وي، چې وروسته د کوکنارو ټولې کروندې له منځه ولاړې او له همدې امله دا راپور بې بنسټه دی.

 

د کورنیو چارو وزارت ویاند زیاته کړه، چې د دغه وزارت ارزونه د ملګرو ملتونو له نشه يي توکو او جرمونو سره د مبارزې ادارې له راپور سره په ټکر کې ده.

 

هغه زياته کړه، چې په تېر کال کې د نشه يي توکو کښت او توليد په ځانګړې توګه د کوکنارو په کښت کې د تېرو کلونو په پرتله د پام وړ کموالى راغلى دى.

 

د ملګرو ملتونو له نشه يي توکو او جرمونو سره د مبارزې ادارې (UNODC) په یوه راپور کې ویلي چې په افغانستان کې به د کوکنارو کښت د تېر کال په پرتله په ۲۰۲۴ کال کې ۱۹ سلنه زیات شي.

 

راپور وايي، په ۲۰۲۴ کال کې به په افغانستان کې د کوکنارو د کښت مساحت ۱۲۸۰۰ هکتارو ته ورسېږي، چې تېر کال ۱۰۸۰۰ هکتاره وو.