آوا - مزارشریف: له سرپل ولایت سره د نوری فایبر شبکې د نښلولو کار د افغانستان د شمال زون د مخابراتو رییس محمد نسیم نظری او د سرپل ولایت د سیمه ییزو چارواکو په حضور کې پیل شو.

د هغه په ​​وينا، د دې پروژې موخه د انټرنېټ د کيفيت لوړول او د سرپل ښاريانو ته د ښو خدمتونو وړاندې کول دي.

نظري زیاته کړه، "د سرپل ولایت د نوري فایبر له ملي شبکې سره د نښلولو په پروژه کې کیندنه، د پایپونو نصبول او د نوري فایبر د تار لګول شامل دي او په پنځو میاشتو کې به بشپړ شي."

په همدې حال کې د سرپل ولايت مرستيال والي محمد نادر حقجو وويل: د دغې پروژې په بشپړيدو سره به د انټرنټ د کارونې په برخه کې د خلکو ستونزې کمې شي او دغه اقدام د خلکو غوښتنه ده.

د سرپل د مخابراتو رئيس قاري لعل محمد خطاب وويل، په دغه ولايت کې د نوري فايبر ملي شبکه د پوهنې، سوداګرۍ او ټولنيزو خدمتونو د ښه والي او د سيمه ييزو سوداګرو په ګټه تمامېږي.

په همدې حال کې د سرپل ولايت يو شمېر اوسېدونکو د دې پروژې له پيلېدو خوښي څرګنده کړه او ويې ويل: د انټرنېټ سستوالى او خرابوالى د دغه ولايت د خلکو له ستونزو څخه دى او دې کار د خلکو هيلې ډېرې کړې دي. 

د یادونې وړ ده، چې د هېواد شاوخوا ۲۶ ولایتونه د نوري فایبر له ملي شبکې سره وصل شوي او له تیز رفتار انټرنیټي خدمتونو څخه برخمن دي.