آوا: دا خبر په داسې حال کې ورکړل شوی، چې شمالي کوریا سیول پیونګ یانګ ته د یوې بې پیلوټه الوتکې د ننوتلو په پار تورن کړی، چې د کوریا په ټاپووزمه کې یې کړکېچ زیات کړی دی.

د شمالي کوریا دولتي خبري اژانس KCNA راپور ورکړ: "ځوانان چې د زده کونکو او د واکمن ګوند ملي لیګ چارواکو په ګډون، چې په اردو کې د شاملیدو غوښتنلیکونه یې لاسلیک کړي، هوډ لري چې په داسې جګړه کې برخه واخلي چې دښمن به له منځه یوسي."

خبري آژانس د شمالي کوریا د ځوانانو له خوا د لاسلیک شویو غوښتنلیکونو انځورونه هم خپاره کړي دي.

د رویټرز خبري اژانس د راپور له مخې، د شمالي کوریا دا ادعا چې یوازې په دوو ورځو کې یې د دغه هېواد په پوځ کې د یو ملیون څخه زیات ځوانان رضاکاران راجستر کړي، په داسې حال کې راپورته کیږي چې د کوریا په ټاپو وزمه کې کړکېچ زیات شوی دی.

شمالي کوریا له دې وړاندې هم په سیمه کې د کړکېچ د زیاتېدو پر مهال ورته ادعاوې کړې وې.

تېر کال د شمالي کوریا دولتي رسنیو راپور ورکړی و چې د دغه هېواد ۸۰۰ زره اتباع په خپله خوښه غواړي د امریکا پر ضد د جګړې لپاره له پوځ سره یوځای شي.

په 2017 کې، د شمالي کوریا د واکمن ګوند نږدې 3.5 میلیونه غړي او سرتیري په رضاکارانه ډول په اردو کې شامل شوي.

د ستراتیژیکو مطالعاتو نړیوال انسټیټیوټ په وینا، شمالي کوریا 1.28 میلیونه فعال سرتیري او شاوخوا 600,000 ریزرو سرتیري لري.