آوا - کابل: د کډوالو او راستنیدونکو چارو وزارت مطبوعاتي دفتر څخه په خپره شوې خبرپاڼه کې راغلي چې د دغه وزارت مسلکي مرستیال مولوي عبدالرحمن راشد د مهاجرت نړیوال سازمان له مشرې میرمن ماریا مویتا سره وکتل.
د وزارت په وینا ښاغلي رشید په افغانستان کې د مېرمن مویتا د کارونو ستاینه وکړه او ویې ویل؛ په هیواد کې د بې ځایه شویو او راستنیدونکو سره ستاسو همکاري او مرستې د ستاینې وړ دي.
د وزارت مرستیال وویل، تاسو د افغانستان ریښتینی انځور نړۍ ته وښود، ترڅو خلک له حقایقو خبر شي، د مهاجرت له نړیوال سازمان سره به د دغه وزارت همکاري تلپاتې وي.
په همدې حال کې د مهاجرت د نړیوال سازمان مشرې اغلې ماریا مویتا په افغانستان کې خپله دوره د یادګار وړ وبلله او د وزارت له مشرتابه څخه یې د دوی د همکارۍ مننه وکړه.
نوموړي دغه راز د وزارت او اړوندو ادارو له دوامداره همکارۍ څخه خوښي څرګنده کړه، ځکه چې په دې وروستيو کې د راستنېدونکو په برخه کې د وزارت له خوا ترسره شوي کارونه د ستاينې وړ دي.
نوموړي دغه راز ډاډ ورکړ، چې د مهاجرت نړيوال سازمان (IOM) به د کډوالو چارو له وزارت سره خپلو همکاريو ته دوام ورکړي.
په افغانستان کې د مهاجرت د نړیوال سازمان (IOM) د مشرې په توګه د ماریا مویتا ماموریت پای ته ورسید.
دریافت صفحه با کد QR