د غور ولایت په مرکز کې د «فلانکوچ» ډوله مسافر وړونکي موټر د چپه کېدو له امله یوه ښځه او یو ماشوم وژل شوي او د یوې ښځې په ګډون پنځه تنه نور ټپیان شوي دي.

آوا: د غور ولايت د امنيې قوماندانۍ له مطبوعاتي دفتره په رالېږل شوې خبرپاڼه کې راغلي چې دغه پېښه تېره ورځ ماسپښين (د اسد ۲۱مه) د کنديوال په کلي کې رامنځته شوې ده.

په خبر کې راغلي دي چې  یو "فلانکوچ" ډوله موټر کله چې د فیروزکوه ښار په جنوب کې د " غورقند" د کلي په لور روان وو، له سړک څخه واوښت او چپه شو.

د دې پېښې لامل څرګند نه دی.

د موټر چلوونکو بې احتياطي، غير معياري سړکونه او غير قانوني سرعت په هېواد کې د ترافيکي پېښو له عمده لاملونو څخه بلل کېږي.

تېره ورځ د بهسودو وردګو په څلور لارې کې د يوې ترافيکي پېښې له امله څلور تنه ووژل شول.