د کورنیو چارو وزارت وايي، د ننګرهار په دوربابا ولسوالۍ کې د امنیتي ځواکونو له خوا د ۱۴۶۰ کیلوګرامه چرسو د قاچاق مخه نیول شوې ده.

آوا - کابل: د اسلامي امارت د کورنیو چارو وزارت ویاند عبدالمتین قانع نن (شنبه د اسد ۱۳مه) په ایکس نیوز کې یوه مقاله خپره کړې او ویلي یې دي چې د ننګرهار ولایت د نشه يي توکو پر وړاندې د مبارزې پولیسو د امنيه قوماندانۍ د امنيتي ځواکونو په عملياتو کې د يو اندازه نشه يي توکو په کشف او نيولو بريالي شول.

د کورنيو چارو وزارت په دې اړه څه نه دي ويلي، چې دغه نشه يي توکي کوم هېواد ته قاچاق کېدل.

د دې وزارت پولیسو د دې قضیې په تړاو ۱۵ کسان نیولي دي.

باید وویل شي، چې د نشه يي توکو له کښت او قاچاق سره د اسلامي امارت مبارزه په جدي توګه دوام لري.