د افغانستان د انرژۍ او اوبو وزارت د پنجشیر له بحیرې څخه کابل ته د اوبو د انتقال د پروژې د بشپړیدو خبر ورکوي او وايي چې دغه طرحه یې د تصویب لپاره سرپرست حکومت ته استولې ده.

آوا - کابل: په وروستیو کلونو کې د پلازمېنې یوشمېر اوسېدونکي وايي چې د څښاک د پاکو اوبو د نشتوالي له امله له ګڼو ستونزو سره مخ دي.

د هېواد د پلازمېنې اوسېدونکي شکايت کوي، چې د پاکو اوبو د ترلاسه کولو لپاره په اوږدو کتارونو کې له ساعتونو انتظار باسي او وايي، له خپلو نورو ورځنيو کارونو بې برخې دي او په ساعتونو په ليکه کې ولاړ دي.

په تېرو کلونو کې حکومت په دغه ګڼ مېشته ښار کې د اوبو رسولو لپاره د درېیو لویو پروژو د پلي کېدو اعلان کړی و، چې تر اوسه یې یوه هم نه ده عملي شوې، خو د کابل اوسېدونکي له حکومته غواړي چې دغه ستونزه هواره کړي.

په همدې حال کې د انرژۍ او اوبو وزارت وايي، چې د پنجشیر له بحیرې څخه کابل ښار ته د څښاک د اوبو رسولو د پروژې سروې او پلان بشپړ شوی او د تصویب لپاره د سرپرست حکومت مشرتابه ته استول شوی دی.

د افغانستان د انرژۍ او اوبو وزارت وايي، د پنجشېر له بازارک څخه تر تره خېلو پورې د اوبو رسولو د پروژې د ۲۰۰ کیلومتره نل لیکې د غځولو پلان ۱۷۰ میلیونه ډالره لګښت لري او د دې پروژې په منظورۍ سره به یې لګښت له حکومت څخه ورکړل شي.

د يادونې وړ ده، چې د دې پروژې په بشپړېدو سره به د پلازمېنې دوه ميليونه اوسېدونکو ته د څښاک پاکې اوبه برابرې شي.