د افغانستان د صنایعو او سوداګرۍ وزارت وايي، چې د دغه وزارت مرستیال د ازبکستان د کانونو، صنایعو او جیولوجي وزارت له مرستیال سره د افغانستان د کانونو په سکټور کې د دغه هېواد د پانګونې د رامنځته کولو په اړه خبرې کړې دي.

آوا - کابل: د اسلامي امارت د صنایعو او سوداګرۍ وزارت مطبوعاتي دفتر په یوه خبرپاڼه کې لیکلي، چې د دغه وزارت مرستیال مولوي احمدالله زاهد د ازبکستان د اسلامي جمهوریت له راغلي پلاوي سره چې مشري یې د اوزبکستان د سوداګرۍ او صنایعو وزارت د مرستیال اعظم قدیر حجایف کوله، وکتل.

د صنایعو وزارت د معلوماتو له مخې، په دې کتنه کې دواړو لورو د افغانستان د کانونو په سکتور کې د پانګونې هوکړې ته د رسېدو پر بنسټ خبرې وکړې.

د صنعت او سوداګرۍ وزارت مرستیال په هېواد کې د پانګونې ملاتړ وکړ او له ازبکستان سره یې د هراړخیزو همکاریو ژمنه وکړه.

د يادونې وړ ده، چې په ټول هېواد کې د امنيت له ټينګښت سره په افغانستان کې پانګونې ته د بېلابېلو هېوادونو لېوالتيا زياته شوې ده.