د اطلاعاتو او کلتور وزارت وايي چې د دغه وزارت سرپرست د غور ولايت د تاريخي ابداتو د ساتنې او په نيمروز ولايت کې د ګرځندوى د صنعت د ودې په اړه د دغو دوو ولايتونو له واليانو سره وکتل او خبرې يې وکړې.

آوا - کابل: د اسلامي امارت د اطلاعاتو او کلتور وزارت مطبوعاتي دفتر د یوې خبرپاڼې په خپرولو سره ویلي چې د دغه وزارت سرپرست ملا خیرالله خیرخواه د نیمروز له والي محمد خالد قاسم سره وکتل. 

ملا خيرخواه په دې کتنه کې وويل چې موږ د نيمروز کلتوری، نشراتي او ګرځندوى برخو ته ډېره پاملرنه کوو او د پرمختګ لپاره يې پوره هڅه کوو.

له بلې خوا د اطلاعاتو او کلتور وزارت سرپرست د غور له والي مولوي احمدشاه دین دوست سره د لرغونو سیمو، د کتابتون د جوړولو او د جام د تاریخي منار په اړه وکتل.

په دې کتنه کې ملا خیرخواه زیاته کړه چې دغه وزارت د غور ولایت د ځوانانو د تعلیم او فکري سمون، د تاریخي ابداتو د ساتنې او د جام د تاریخي منار د ساتنې په برخه کې چې یو له لرغونو اثارو څخه دی، خپلې هڅې ترسره کوي. 

په دې کتنه کې د غور والي په دغه ولايت کې د لرغونو سيمو، تاريخي ابداتو، د کتابتون د جوړولو او د يوه معياري موزيم د جوړولو په اړه خبرې وکړې.