آوا: په مزارشریف کې د یما پټرولیم شرکت مشر او یو تن سوداګر سید کریم هاشمی چې د هیواد په شمال کې د نفتو د تصفیې د یوې کارخانې د جوړولو په کار بوخت دی، وویل: زموږ موخه دا ده چې هېواد به د تېلو او ګازو په برخه کې پر ځان بسیا شي او له حکومته غواړم چې له ملي سوداګرو سره همکاري او ملاتړ وکړي.

 

هغه زیاته کړه: د کارموندنې رامینځته کول او د کورني بازار اړتیاوې پوره کول په هیواد کې د نفتو او ګازو د تولید شرکتونو د ونډې یو هدف دی او دا ډول لوی نوښتونه ډیر ظرفیت او د سوداګرو ونډې ته اړتیا لري. هغه زیاته کړه: "موږ له سوداګرو غواړو چې په افغانستان کې پانګونه وکړي ځکه چې د پانګونې شرایط چمتو دي."

 

په همدې حال کې د شمال د نفتو او ګازو د اتحاديې مشر عبدالمومن ضيايي او د هېواد په شمال کې د نفتو او ګازو د تصفيې د فابريکو د جوړولو او فعاليت په برخه کې يو تن سوداګر وايي چې د اوسنيو تصفيه کوونکو ظرفيت له ٤٣٠٠ ټنو څخه زيات دى. هره ورځ د امو دریا د نفتو له ساحې څخه د تیلو استخراج نږدې 1,100 ټنه دی.

 

هغه وويل: "موږ له دولت څخه غوښتنه کوو چې د امو دريا د نفتو له ساحې څخه د نفتو د استخراج ظرفيت لوړ کړي، ترڅو د نفتو او ګازو د تصفيې لپاره خام مواد برابر شي."

 

په همدې حال کې د افغانستان د نفتو او ګازو د شرکتونو سلاکار عبدالرشید سلیم وویل، چې تر اوسه د ۸۷ میلیونو ډالرو په ارزښت د تېلو د تصفیې څلور فابریکې په کار پیل کړی او ډېر ژر به یوه بله لویه تصفیه خانه هم جوړه شی. هغه وویل، تمه کیږي چې پانګه اچونه به په څو پړاوونو کې 323 ملیون ډالرو ته ورسیږي.

 

هغه وويل، په ريفائنري کې له زرو څخه زيات کسان په مستقيم ډول په کار بوخت دي او تمه ده چې نور نفتي توکي هم له خامو تېلو څخه استخراج شي، چې ورسره به روزګار زيات شي.

 

دغه راز دبلخ ولايت مرستيال مولوي نورالهدي ابو ادريس هم په هېواد کې دزياتې پانګونې په خاطر دسوداګرۍ داستازو د هڅونې په ترڅ کې وويل: دهېواد په ټولو برخو کې دخودکفايي او خودکفا کولو لپاره بايد هڅې او کړنې ترسره شي. حکومت د سوداګرو او پانګوالو همکار او ملاتړی دی.

 

د یادولو وړ ده چې د نفتو او ګازو د تولید او تصفیې په برخه کې د شرکتونو د پانګونې په زیاتیدو سره به ۲۰۰۰ تنو ته د کار زمینه برابره شي.