د میدان وردګ ولایت سیمه ییز چارواکي د دغه ولایت د صنعت او سوداګرۍ په ریاست کې د ښځو د صنعت او سوداګرۍ خونې د پرانیستلو خبر ورکوي.

آوا - کابل: د میدان وردګو د صنعت او سوداګرۍ ریاست مسؤلینو په دې مناسبت جوړو شویو مراسمو کې وویل، اسلامي امارت ژمن دی چې د اسلامي شریعت د اصولو پر بنسټ ښځو ته د سوداګرۍ اسانتیاوې برابرې کړي.

د چارواكو په وينا، د دغه دفتر په پرانېستلو سره به په دې ولايت كې يو زيات شمېر ښځو ته د كار زمينه برابره شي.

د يادونې وړ ده، چې څه موده وړاندې د افغانستان د اقتصاد وزارت اعلان وکړ، چې په افغانستان کې د هغو مېرمنو شمېر چې کوچني او لوى کاروبار لري، شاوخوا ٥٤ زره ښځې دي.