آوا - کابل: د رئیس الوزرا اقتصادي مرستیال عبدالغنی برادر اخند نن یکشنبه (د دلوی ۲۲ مه) د سترې اقتصادی شورا د رهبرۍ، د مالیې د ثبات کمېټې او د بانکونو شریکانو په دوهمه ناسته کې. ; نوموړي د هېواد په بيارغونه او پرمختګ کې د بانکدارۍ سکتور رول ارزښتناک وباله او ويې ويل چې هېوادوالو ته د غوره بانکي خدمتونو وړاندې کول د بانکي سکټور په وده او د هېواد په پرمختګ کې مهم رول لري.

 

نوموړي په دې کتنه کې د بانکدارۍ په برخه کې د پرمختګونو تر څنګ یو شمېر ستونزو ته هم اشاره وکړه او ویې ویل، چې تر اوسه د یو یا دوو بانکونو د مایعاتو ستونزه په بشپړه توګه نه ده حل شوې او د بانکونو له شریکانو او د مالیې له غړو یې وغوښتل. د ثبات کمیټه د دې ستونزې د حل لپاره په ګډه همکاري وکړي.

 

د رئیس الوزرا د دفتر اقتصادي مرستیال هېوادوالو ته ډاډ ورکړ چې اسلامي امارت د خلکو د اقتصادي ستونزو د هواري لپاره کوټلي ګامونه پورته کړي او په دې برخه کې پوره ژمن او اوږدمهاله پلانونه لري.

 

نوموړي د بېلګې په توګه خلکو ته د کاري فرصتونو رامنځته کول، د انفلاسیون د کنټرول، د کانونو قانوني استخراج، معیاري کول، د کرنې سکتور، د اوبو مدیریت، د کورنیو او بهرنیو پانګونو لپاره د شرایطو برابرول او یو شمېر نورو برخو ته اشاره وکړه.

 

د اسلامي امارت دغه چارواکي دغه هدف ته د رسیدو په برخه کې د جواز لرونکو بانکونو، ملي سوداګرو او پانګوالو د ونډه والو همغږي او همکاري مهمه وبلله او له هغوی یې وغوښتل چې په دې برخه کې له اسلامي امارت سره بشپړه همکاري وکړي.

 

د رئیس الوزرا اقتصادي مرستیال په هېواد کې د جواز لرونکو بانکونو ونډه والو ته هم بلنه ورکړه او له هغوی یې وغوښتل چې خپل بانکونه په ښه توګه اداره کړي او د هېواد د بانکدارۍ سکتور په وده او پراختیا کې ونډه واخلي.

 

د اسلامي امارت په استازیتوب یې دوی ته ډاډ ورکړ، چې د دوی ټولې ستونزې به د قانون په چوکاټ کې حل شي.

 

د دې غونډې په پای کې د عبدالغني اخند برادر د مالي ثبات کمېټې غونډه مهمه وبلله او هیله یې څرګنده کړه چې د دغو غونډو دوام به د هېواد په ځانګړې توګه د بانکدارۍ سکتور د ستونزو په حل کې ګټور تمام شي.