د کډوالو او راستنیدونکو چارو وزارت سرپرست خلیل الرحمن حقاني د ملګرو ملتونو د کډوالو د عالي کمېشنرۍ د اکمالاتو او معافیت له مشرې شوکو شیموزاوا سره په لیدنه کې ویلي، چې تېر کال له یو میلیون ډېر کډوال افغانستان ته راستانه شوي دي.

آوا - کابل: د مهاجرینو او راستنیدونکو چارو وزارت مطبوعاتي دفتر د دې خبر په خپرولو سره ویلي چې د دغه وزارت سرپرست خلیل الرحمن حقاني د میرمن شوکو شیموزاوا د کډوالو لپاره د ملګرو ملتونو عالي کمیشنر سره وکتل.

ویل کیږي، چې په دې کتنه کې مېرمن شیموزاوا چې په دې وروستیو کې له پاکستان څخه کابل ته راستنه شوې ده، د خپل سفر جزئیات د کډوالو چارو له سرپرست وزیر سره شریک کړل.

دغه راز د کډوالو چارو وزارت په خبرپاڼه کې د ملګرو ملتونو د دغه چارواکي له قوله راغلي، چې نوموړي له پاکستاني چارواکو غوښتي، چې د کډوالو کارتونه دې نوي کړي او له افغان کډوالو سره دې په درنښت چلند وکړي.

د کډوالو چارو وزارت سرپرست له افغانستان سره د ملګرو ملتونو سازمان له همکاریو مننه وکړه او له اسلامي امارت سره یې د دغه سازمان پر همغږي ټینګار وکړ.

د يادونې ده، چې پاکستان له تېرو څو مياشتو راهيسې د افغان کډوالو د جبري شړلو لړۍ پيل کړې ده.