آوا - بامیان: د بامیان ولایت والي مولوي عبدالله سرحدي او ورسره مل پلاوي د دغې پروژې د پرانېستې په مراسمو کې وویل: د دغې حیاتي پروژې د جوړولو د کار په بشپړیدو او په عملي کیدو سره به د دغه ولایت د خلکو د سیغان ولسوالۍ د قره خېلو کلي د څښاک د پاکو اوبو د نشتوالي له امله د خلکو ستونزې هوارې شوې.

 

د باميانو والي دغه راز له خلکو وغوښتل چې د اوبو رسولو د دغې پروژې د عملي کولو او ګړنديتوب په خاطر دې له سيمه ييزې شورا سره همغږي او د دغې پروژې له مسوولينو سره همکاري وکړي.

 

ویل شوي، چې د اوبو رسولو دغه صحي شبکه د ۳ میلیونه ۶۲۲ زره افغانیو په لګښت د بامیانو ولایت د کلیو د بیارغونې او پراختیا ریاست تر څارنې لاندې د تطبیق کوونکي شرکت له خوا چې د اسلامي رفاه موسسې له خوا تمویلیږي، جوړه شي.

 

د چارواکو په وینا د دې پروژې په بشپړیدو سره به ۱۵۰ کورنۍ له پاکو اوبو څخه برخمنې شي.