د کورنیو چارو وزارت د نشه يي توکو پر وړاندې د مبارزې معین وايي، د بدخشان ولایت په مرکز فیض آباد ښار کې د ښځو او ماشومانو د درملنې لپاره د معتادینو د درملنې مرکز جوړ شوی دی.

آوا - مزار شریف: د کورنیو چارو وزارت د نشه یی توکو پر وړاندې د مبارزې معین ملا عبدالحق، د بدخشان ولایت په مرکز فیض آباد ښار کې د ښځو د معتادینو د درملنې مرکز د پرانیستې په مراسمو کې وویل: دا چې د اسلامي امارت حکومت د نشه يي توکو د استعمال له منځه وړلو ته ژمن دی، نو له همدې امله د دې ناوړه پديدې د له منځه وړلو لپاره جدي هڅې روانې دي چې د افغانستان د خلکو ژوند يې اغېزمن کړی دی.

ده ومنله چې د معتادينو د درملنې د مرکزونو د جوړولو او فعاليت بهير د يوه ځانګړي پروګرام له مخې دوام لري او دا هڅې به تر هغه دوام وکړي چې په نشه يي توکو د ټولو روږدو کسانو درملنه نه وي شوې، ځکه له دې پديدې څخه د خلکو ژغورل زموږ لومړيتوب دى.

د کورنيو چارو وزارت د نشه يي توکو پر وړاندې د مبارزې معین په فيض آباد ښار کې په نشه يي توکو د روږدو مېرمنو د درملنې مرکز جوړولو او پرانېستې ته په اشارې سره زياته کړه: د معتادينو د درملنې دغه مرکز د کم عمره ښځو او ماشومانو د درملنې او روغتون ته د درملنې په موخه جوړ شوى دى.

همکار ملا وويل، چې د ښځو د معتادينو د درملنې د دغه مرکز د درملنې او تغذيې لګښت د کورنيو چارو وزارت د نشه يي توکو پر وړاندې د مبارزې معينيت له خوا ورکول کېږي.

په همدې حال کې دبدخشان ولايت د نشه يي توکو پرخلاف د مبارزې رييس شفيق الله حافظي وويل : په فيض آباد ښار کې د ښځو لپاره د روږدو کسانو د مخنيوي ٥٠ بستريز مرکز له پرانستل کيدو وروسته مو ټولې هغه ښځې او ماشومان راټول کړل چې عمرونه يې کم دي.

د يادونې ده، چې د شمېرو له مخې، په بدخشان ولايت کې په نشه يي توکو د روږدو کسانو شمېر ٥٣ زره دى، چې درې زره يې ښځې او ماشومان دي. دغه راز د اسلامي امارت له تاسیس وروسته څه باندې شپږ زره تنه په نشه يي توکو روږدي کسان له درملنې وروسته بېرته عادي ژوند ته ستانه شول.