د هېواد د اطلاعاتو او فرهنګ وزير د هرات له تاريخي ګودامونو څخه د ليدنې پر مهال د دغه ولايت د تاريخي آبداتو د ساتنې او بيارغونې لپاره د مرکزي حکومت پر جدي پاملرنې ټينګار وکړ.

آوا - هرات: نن چهارشنبه (د جدي ۲۰مه) د هېواد د اطلاعاتو او فرهنګ وزیر مولوي خیرالله خیرخواه د هرات د اطلاعاتو او فرهنګ له رئیس مولوي احمدالله متقي سره د هرات له تاریخي ګودامونو څخه د لیدنې پر مهال وویل؛ د تاریخي اثار د ساتنې او بيارغونې په برخه کې د مرکزي حکومت جديت ټينګار وکړ.
 
د هېواد د اطلاعاتو او کلتور وزیر وايي، دغه وزارت به د هېواد د ټولو تاریخي اثارو ساتنه وکړي.
 
مولوي خيرخواه د هرات له تاريخي ګودامونو څخه د ليدنې پر مهال وويل: له دې ودانۍ څخه په راتلونکي کې په بېلابېلو فرهنګي برخو کې ګټه اخيستل کېږي او په راتلونکي کې به بېلابېل نندارتونونه هم جوړ شي.
 
د هغه په ​​وينا، د هېواد د اطلاعاتو او فرهنګ وزارت هڅه کوي، چې دغه تاريخي ودانۍ د لاسي صنايعو د پلور او د بهرنيو سيلانيانو د راجلبولو لپاره په يو داخلي مارکېټ بدله کړي.
 
د يادونې وړ ده، چې د هرات د ګودامونو تاريخي کمپلکس، چې د عادل الرحمن خان په وخت کې جوړ شوى، ١٤ زره متره مربع مساحت لري او د هرات ښار په زړه کې موقعيت لري.
 
په همدې حال کې ښاغلي خيرخواه پرون د هرات د اطلاعاتو او فرهنګ رياست له اداري کارکوونکو سره په کتنه کې د هېواد په شپږو ولايتونو کې د بهرنيو سيلانيانو لپاره د ځانګړو هوټلونو د جوړولو اعلان وکړ.
 
هرات د هېواد په لوېديځ کې يو له لرغونو ولايتونو څخه دى، چې څه باندې ٧٠٠ ارزښتناک لرغوني اثار په کې شته.