آوا - بامیان: د بامیان ولایت والي عبدالله سرحدی نن سه شنبه د قوس ۲۸ مه د یکاولنګ ولسوالۍ په پودینه سیمه کې د اوبو رسولو د یوې صحي شبکې پروژه چې د وزارت له خوا تمویلیږي، پرانیستل. 

 

ويل کيږي چې دغه پروژه د ٧ ميليونه ٩٦٥ زره ٩٠٢ افغانيو په لګښت جوړه شوې او د دغې پروژې له صحي اوبو څخه ١٨٧ کورنۍ ګټه اخلي.

 

د دې پروژې د پرانېستې په مراسمو کې د باميانو والي وويل: د پدينې د شورا خلک له څو کلونو راهيسې د څښاک د پاکو اوبو د کمښت له جدي ستونزې سره مخ وو او د دغې پروژې په پلي کېدو سره به د څښاک د کمښت ستونزه هواره شي. د دې سيمې د اوسېدونکو لپاره د اوبو ستونزه هواره شوې او خلک له وېرې پرته ژوند کولای شي او د څښاک د صحي اوبو اسانتياوې ورته برابرې کړي، چې په کور دننه ورته اړتيا لري.

 

د باميان‌ والي د خلکو ترمنځ د يووالي او ورورولۍ پر ټينګښت ټينګار وکړ او ويې ويل: د خلکو تر منځ همغږي د ټولنې د پرمختګ لامل ګرځي او له خلکو غوښتنه کوو چې له خپل حکومت سره اوسي او له حکومت او د سيمه ييزې ادارې له مشرتابه سره همکاري وکړي، حکومت هم هڅه کوي چې په بامیان ولایت کې د خلکو او د لرو پرتو او محرومو سیمو د ستونزو د حل په موخه نورې پروژې هم پلي کړي.