د انرژۍ او اوبو وزارت سرپرست ملا عبداللطیف منصور د مس عینک کان د قراردادي شرکت له مسوولینو سره په کتنه کې د دغې پروژې د کار په چټکتیا ټینګار وکړ او ویې ویل چې دغه وزارت د عینک کان د اوبو او انرژۍ په برابرولو کې همکاري کوي. 

آوا - کابل: د انرژۍ او اوبو وزارت مطبوعاتي دفتر د یوې خبرپاڼې په خپرولو سره ویلي چې د دغه وزارت سرپرست ملا عبداللطیف منصور په لوګر ولایت کې د مس عینک کان د قراردادي شرکت له مسوولینو سره وکتل. دواړو خواوو د کانونو د استخراج په برخه کې د اوبو او برېښنا د برابرولو په برخه کې د ګډې همکارۍ په اړه بحث وکړ او د یاد کان په اړه یې د نظرونو تبادله وکړه.

په دې کتنه کې د ياد شوي شرکت مسوولينو د خپلو فعاليتونو او پلانونو په اړه د معلوماتو د وړاندې کولو په ترڅ کې د انرژۍ او اوبو وزارت له مشرتابه څخه وغوښتل چې د اوبو رسولو او د پروژی د اړتيا وړ انرژۍ د رسولو د تطبيق په برخه کې همکاري وکړي.

له بلې خوا د انرژۍ او اوبو وزارت سرپرست د اوبو او انرژۍ په برخه کې د دغه وزارت له همکارۍ څخه د یادې پروژې اهمیت او ګټې ته اشاره وکړه او د پروژو د چارو د چټکتیا په برخه کې یې هغوی ته ډاډ ورکړ. د لا زیاتې همغږۍ لپاره د اوبو او انرژۍ وزارت، د کانونو او پټرولیم وزارت، د اطلاعاتو او کلتور وزارت او د قراردادي شرکت استازي د یوې ګډې کمیټې اړتیا ته اړتیا لري ترڅو یو قرارداد جوړ کړي او په دوامداره توګه د اسانتیا او چټکتیا لپاره په ګډه کار وکړي. 

د يادونې وړ ده، چې څه موده وړاندې د انرژۍ او اوبو وزارت د اوبو معين هم د ياد شوي شرکت له مسوولينو سره په يوه غونډه کې د اوبو د سرچينو د پېژندلو او د اوبو رسولو لپاره د اړتيا وړ اوبو رسولو په موخه د همغږۍ او ګډې همکارۍ په اړه خبرې کړې وې.