د سرپل ولايت د امنيې قوماندانۍ وياند وايي: له بده مرغه د سرپل ولايت د سانچارک ولسوالۍ په تغايخواجه کلي کې يو شمېر ماشومانو له يوه ناچاوده لاسي بم سره لوبې کولې چې هغه پر دوی چاودنه کړي.

آوا - مزار شریف : د سرپل ولایت د پولیسو ویاند دین محمد نظری د دغه ولایت په سانچارک ولسوالۍ کې د ماشومانو په منځ کې د لاسی بم د چاودنې په اړه د آوا خبریال ته په خواشینۍ سره وویل: د چهارشنبې په ورځ د ماشومانو په منځ کې د لاسي بم چاودنه وشوه، دوی له بم سره لوبې کولې، که څه هم پولیسو سمدستي ماشومان نږدې روغتیایی مرکز ته انتقال کړل، خو په دې چاودنه کې یو ماشوم مړ شو.

هغه زياته کړه: "له بده مرغه د سانچارک ولسوالۍ د تاغيخواجه په کلي کې يو شمېر ماشومان ناچاوده لاسي بمونه د لوبو په توګه کاروي. د دې بم د چاودنې له امله يو ١٤ کلن ماشوم مړ او دوه نور ټپيان شوي دي."

نظري څرګنده کړه چې د سرپل ولايت پوليس له بمونو او ماينونو د پاکو شويو سيمو د پاکولو په لاره کې جدي تدبيرونه نيسي او له اوس څخه به زموږ هڅې زياتې شي څو د داسې پيښو شاهدان نه شو.

بايد يادونه وشي، چې له جګړو څخه پاتې شوي ماينونه او بمونه د افغانستان د خلکو په ځانګړې توګه د ماشومانو لپاره يو جدي ګواښ دى.