د سمنګان ولایت د کلیو د بیارغونې او پراختیا رئیس وايي، د اوبو رسولو درې پروژې د سمنګان ولایت په مرکز ایبک ښار، خرم او سارباغ ولسوالیو او حضرت سلطان ولسوالۍ کې د خلکو د جدي اړتیاوو پر بنسټ ګټې اخیستنې ته وسپارل شوې. په دغه ولايت کې د څاګانو په کيندلو، د اوبو د زېرمه کولو او د نل ليکې د سيسټم په جوړولو سره د دغو سيمو د اوسېدونکو د اوبو ستونزه هواره شوې ده.

آوا - مزار شریف: د سمنګان ولایت د کلیو د بیارغونې او پراختیا رییس اختر محمد مصباح وايي، د اوبو رسولو درې پروژې د دغه ولایت په مرکز ایبک ښار کې د خلکو د جدي اړتیاو پر بنسټ پیل شوې دي. د سمنګان ولايت د خرم او سارباغ ولسواليو او د حضرت سلطان په ولسواليو کې د څاګانو کيندلو، د اوبو د زېرمه کولو او د نل ليکې د سيسټم جوړولو چارې پيل شوې چې د دغو سيمو د اوسېدونکو د اوبو د بحران د هواري لامل شوى دى.
 
ده زياته کړه: د اوبو رسولو دغه درې شبکې د څه دپاسه شپږ ميليونه افغانيو په لګښت د يونيسف ادارې او د خلکو په مرسته جوړې شوې او له نهو مياشتو هلو ځلو وروسته ګټې اخيستنې ته وسپارل شوې.

مصباح وويل، د آچې ملې کلي، اوغري قل کلي او يک توت کلي چې زرګونه اوسېدونکي لري، د اوبو ستونزه هواره شوې او څه باندې ٧٤١ کورنۍ د څښاک له پاکو اوبو برخمنې شوې دي.
 
په همدې حال کې د سمنګانو ولايت د آچې ميلي، اوغري قل او يک توت کليو يو شمېر اوسېدونکو وويل: پخوا به موږ اوبه نه درلودې او له ډېرو ستونزو سره به مو خپلې اړتياوې پوره کولې، خو له نېکه مرغه نن وينو چې د اوبو رسولو د شبکې ستونزه هواره شوې ده. د خلکو ستونزه.