د قرغزستان د بهرنیو چارو وزارت د منځنۍ اسیا له هېوادونو غوښتي چې د افغانستان په اړه همکاري او همغږي زیاته کړي.

آوا: جنبیک کولوبایف د منځنۍ اسیا د هېوادونو د بهرنیو چارو د وزیرانو په کلنۍ غونډه کې وویل چې په افغانستان کې سوله او ثبات د سیمې د امنیت او سوکالۍ لپاره مهم دی.

د قرغزستان د بهرنیو چارو وزارت د خبرپاڼې پر بنسټ، کولبایف په دې ناسته کې په افغانستان کې د یوناما د فعالیتونو پر دوام ټینګار وکړ.

په دې غونډه کې چې د دوشنبې او سه شنبې په ورځو د قرغزستان په پلازمېنه بشکیک کې جوړه شوې وه، د اسلامي امارت هیڅ چارواکي ګډون نه درلود، خو د یوناما مشرې روزا اوتونبایوا په کې ګډون وکړ او په افغانستان کې یې د یوناما د فعالیتونو په اړه معلومات ورکړل.