د شیعه ګانو لسګونو مشرانو او مخورو د هرات له والي سره په کتنه کې د هرات په المهدي جبریل ښارګوټي کې د دوو دیني عالمانو شهادت ته په اشارې سره وویل، د هېواد دښمنان هڅه کوي چې خلک سره ووېشي. 

آوا - هرات: په دې غونډه کې د هرات ولایت مشرانو او دیني عالمانو ټینګار وکړ چې شیعه او سني په ورورګلوۍ او یووالي کې ژوند کوي او له دا ډول پیښو سره به بیل نشي.

د هرات والي شیخ نور احمد اسلام جار هم وویل چې د اسلامي امارت چارواکي د شیعه وګړو په غم کې شریک دي.

د هرات والي ټینګار وکړ چې امنیت د هر وګړي حق دی او د خلکو لپاره د امنیت تامینول د اسلامي امارت د حکومت دنده ده.

ښاغلي اسلام جار دا هم وویل چې د امنیت د تامین لپاره له امنیتي ځواکونو سره همکاري اړینه ده.

د يادونې وړ ده، چې د تېرې پنجشنبې په ورځ (۲ قوس) د هرات په المهدي جبرائيل ښارګوټي کې دوه ديني عالمان د بريد له امله شهيدان شول.