آوا - کابل: د هند په پلازمېنه ډیلي کې د افغانستان سفارت پرون (جمعه، د قوس ۳ مه) په یوه خبرپاڼه کې اعلان وکړ، چې خپل فعالیتونه یې په بشپړه توګه بند کړي دي. په خبرپاڼه کې راغلي چې په ډيلي کې د افغانستان د اسلامي جمهوریت سفارت د تل لپاره تړل شوی دی.

 

سفارت وویل چې دا د "هند د حکومت د پرله پسې ننګونو" له امله له پرون راهیسې د تل لپاره تړل شوی دی.

 

په هند کې د افغانستان سفارت د روان لمریز کال د غبرګولي په نهمه اعلان کړی و چې د کوربه هېواد له لوري د ملاتړ د نشتوالي، د افغانانو د ګټو لپاره د خدمتونو په برخه کې د تمې د نه پوره کېدو او د افغانستان د خلکو د هیلو د نه پوره کېدو له امله به خپل فعالیتونه ودروي. 

 

د دغه سفارت په یوه نوې اعلامیه کې راغلي چې د دغه سفارت د فعالیت ځنډول په دې هیله شوي چې د هند د حکومت دریځ بدل شي او د خپل عادي فعالیت د دوام لپاره زمینه برابره شي.