آوا - کابل: پرون (چهارشنبه، قوس ۱)، د دغه وزارت په یوه بیان کې لیکل شوی: «د موقت بشردوستانه اوربند اعلان او د غزې خلکو ته د بشردوستانه مرستو په رسولو کې د قطر حکومت فعاله ډیپلوماسۍ. د ستاینې وړ دی، او د دې خلکو د ژغورلو لپاره دایمي اوربند ته اړتیا ده."

 

د بهرنیو چارو وزارت دغه راز زیاته کړه: د فلسطین د مسئلې هراړخیزه او دوامداره حل لاره د فلسطین د تاریخی نیواک ختمول او د دغه هیواد خلکو ته د نورو خلکو په شان د یو خپلواک حکومت د لرلو حق ورکول دی.

 

دغه وزارت همداراز لویدیځ حکومتونه او د بشري حقونو سازمانونه د فلسطین او اسرائیلو په جګړه کې په دوه ګوني معیارونو تورن کړل.

 

دا په داسې حال کې ده چې څو ورځې وړاندې د افغانستان د بهرنیو چارو وزارت له ملګرو ملتونو او نورو «بشري حقونو دعوه کوونکو» سازمانونو څخه غوښتي وو چې د «بشریت پر ضد د اسراییلو د جنایتونو» پر وړاندې دې واضح، روښانه او عادلانه دریځ غوره کړي.

 

د بهرنیو چارو وزارت همداشان عربي او اسلامي هیوادونو ته ویلي چې د غزې په تړانګه کې د جګړې پر وړاندې مؤثر او معقول اقدامات وکړي او خپل دیني او بشري مسوولیتونه ادا کړي.