آوا - افغان کډوال کاناډا ته واستول شول

د کاناډا د تابعیت او کډوالۍ وزارت اعلان کړی چې له اسلام اباد څخه ټورنټو ته یې په یوه چارټر الوتکه کې ۳۱۶ افغان کډوال انتقال کړي دي.

آوا: وزارت په خپله اکس پاڼه کې زیاته کړې، چې دغه مهاجر پناه غوښتونکي به د سینټ کتارینز، کالګري او هامیلټن په ښارونو کې میشت شي.

د کاناډا د تابعیت او کډوالۍ وزارت ویلي چې د ۲۰۲۱ کال له اګست میاشتې راهیسې کاناډا ۴۰ زره افغان کډوالو ته پناه ورکړې ده.

په همدې حال کې د کاناډا حکومت وايي، په تېرو دوو اونیو کې دغه هېواد شاوخوا ۱۰۰۰ افغان اتباع دغه هېواد ته لېږدولي دي.