آوا - کابل: د اسلامي امارت د کرنې، اوبولګولو او مالدارۍ وزارت ویاند مصباح الدین نن (سه شنبه د عقرب ۳۰ مه) د آوا له خبریال سره په مرکه کې ویلي چې مولوي عثمانی د کرنې، اوبولګولو او مالدارۍ وزارت د کرنې او مالدارۍ وزیر د کرنې د پراختیا له وجهي صندوق څخه د دوو شرکتونو لپاره د اسلامي مالي خدمتونو لپاره د ۷۰ میلیونو افغانیو د ورکړې طرحه تصویب کړه.

 

مصباح الدین مستین زیاته کړه، چې مولوي عثماني چانسلر په خپل دفتر کې د کرنې د پراختیا صندوق له رئیس انجینر عبدالغفور غفاري او د تخمونو د تثبیت رئیس مولوي صدیق الله په شتون کې د دوو شرکتونو په غوښتنه د ۷۰ میلیونه افغانیو په ارزښت اسلامي مالي خدمات منظور کړل.

 

د کرنې وزارت د ویاند په خبره، د دغې غونډې په پیل کې د کرنې د پراختیا صندوق رئیس د غونډې موضوع شریکه کړه او د افغان ریډ پومی ګرینټ او شعیب یحیی صنعتي شرکت د پور غوښتنې په اړه یې معلومات ورکړل.

 

ښاغلی مستین وايي، د کرنې او مالدارۍ وزیر د اسلامي مالي خدمتونو د عرضه کوونکو شرکتونو د غوښتنې له اورېدو وروسته د دغو دوو مېوو د جوس جوړونې او کارتن جوړونې شرکتونو ته د ۷۰ میلیونو افغانیو پور منظور کړ.

 

د کرنې، اوبولګولو او مالدارۍ وزارت دغه چارواکي څرګنده کړه چې د دغو اسلامي مالي خدمتونو د ورکړې موخه د خصوصي سکتور ملاتړ او په افغانستان کې د کرنې وده او پراختیا ده.

 

د يادونې وړ ده چې د افغانستان د نږدې ۷۰ سلنه خلکو روزي پر کرنه ده.