پاکستاني اعتراض کوونکي: د افغان کډوالو په شړلو کې د حکومت کړنه د خندا وړ ده

په داسې حال کې چې له پاکستان څخه د افغان کډوالو د ایستلو لړۍ دوام لري او له پېښور څخه د دغو کډوالو د نیولو او شړلو لړۍ هم د یکشنبې په ورځ پیل شوې، د پاکستان په کراچۍ ښار کې خلکو او د بشري حقونو فعالانو د افغان کډوالو د نیولو او شړلو غوښتنه وکړه.

افغان غږ خبری آژانس: خلکو او د بشری حقونو فعالانو د پاکستان په کراچۍ ښار کې یوه مظاهره وکړه او له دغه هیواد څخه د افغان مهاجرینو د نیولو او ویستلو د بندیدو غوښتنه یې وکړه.

د کډوالو لپاره د عمل ګډې کمیټې اعلان وکړ چې د دې مظاهرې تنظیمونکو د افغان کډوالو اخراج "کرکه او غیر مسؤلانه" ګڼلې ده.

دغې کمېټې په یوه بیان کې ټینګار کړی، چې د پاکستان د موقت حکومت له پرېکړې وروسته چې د افغان کډوالو د شړلو په اړه د پاکستان پولیس او نورې قانون جوړونکې ادارې په کرکې او غیر مسوولانه ډول د افغان کډوالو او پاکستانیو پښتنو ځورول، وېرول او په غیر قانونی توګه نیول دی.

د کډوالو د حقونو د دفاع دغه سازمان ویلي چې پاکستان باید د افغانستان په بې ثباتۍ او د میلیونونو خلکو ژوند له خطر سره مخ کولو کې خپله ونډه ومني.

په دغه بیانیه کې د پاکستان له موقت حکومت څخه غوښتل شوي چې د اخراج او غیر قانوني توقیف بهیر ودروي او د توقیف شویو پناه غوښتونکو لپاره د اساسي قانون له مخې د آزادې محاکمې زمینه برابره کړي.

د تورخم او چمن له پولو تر اوسه له ۳۱۷ زره ډېر کډوال افغانستان ته راستانه شوي دي.

په همدې حال کې د کډوالو په چارو کې د ملګرو ملتونو عالي کمېشنرۍ هم ویلي چې له پاکستانه د کډوالو جبري ستنېدل به په افغانستان کې بشري بحران لا پسې ژور کړي.

د عقرب په ٢٦مه د جمعې په ورځ په يوه راپور کې دغې بې سارې ادارې ويلي چې د راستنېدونکو په راتګ سره به افغانستان د کمو سرچينو لکه د کور، روغتيايي خدمتونو او دندو په برخه کې د لا زياتې سيالۍ شاهد وي.