آوا - ملګري ملتونه: تر اوسه د تورخم له لارې ۲۱۰ زره کډوال افغانستان ته راستانه شوي دي

ملګري ملتونه: تر اوسه د تورخم له لارې ۲۱۰ زره کډوال افغانستان ته راستانه شوي دي

په تورخم کې د ملګرو ملتونو یوه چارواکي نن پنجشنبه د عقرب په ۱۸ مه رسنیو ته وویل چې د پاکستان د حکومت له خوا د افغان کډوالو د جبري ایستلو له پرېکړې وروسته له دې پولې څه باندې ۲۱۰ زره کسان بېرته افغانستان ته راستانه شوي دي.

آوا - کابل: په تورخم کې د ملګرو ملتونو د کډوالو چارو ادارې یوه چارواکي ارشاد خان ازادي راډيو ته وویل چې تېره شپه ناوخته د تورخم له پولې ۴۱۳۰ نور بې اسناده افغان کډوال افغانستان ته لېږدول شوي دي.

د ملګرو ملتونو دغه چارواکي زياته کړه: تر پرون (د عقرب ١٧مه) تر اوسه له ٢١٠ زرو څخه زيات کسان يوازې د تورخم له لارې افغانستان ته راستانه شوي دي. له پاکستان څخه هره ورځ لسګونه لارۍ بې اسناده افغان کډوال راستنېږي.

له پاکستان څخه د بې اسنادو افغانانو د ایستلو لړۍ دوام لري او نن هم د تورخم او چمن له لارې ګڼ شمېر کورنۍ افغانستان ته راستانه شوي دي.

دا په داسې حال کې ده چې د پاکستان حکومت د اسلامي امارت او نړیوالو مرستندویه موسسو د غوښتنې خلاف د افغان کډوالو د زور زیاتي د ایستلو پریکړه کړې ده.