د افغانستان د صنایعو او سوداګرۍ وزارت چارواکي د روان کال په لومړیو شپږو میاشتو کې د تازه مېوې په صادراتو کې یو نیم چنده زیاتوالی اعلانوي او وايي چې په دې موده کې شاوخوا شل زره ټنه مېوه صادر شوې دي.

آوا - کابل: د افغانستان د صنایعو او سوداګرۍ وزارت ویاند عبدالسلام اخندزاده جواد د دوشنبې په ورځ (عقرب ۸) د آوا خبریال ته وویل چې سږ کال د تازه میوو صادرات د پام وړ زیاتوالی ښيي.
 
جواد زياته کړه، د روان کال په لومړيو شپږو مياشتو کې ١٨٠٩٧ ټنه تازه مېوه بهر ته صادره شوې، په داسې حال کې چې تېر کال په همدې موده کې شاوخوا لس زره ټنه تازه مېوه بهر ته صادر شوې دي.
 
هغه زياته کړه، چې دغه مېوې عربي هېوادونو، ترکيې، روسيې، چين، هند او پاکستان ته صادرې شوې دي.
 
د جواد د څرګندونو پر بنسټ؛ په دې موده کې د تازه مېوو سربېره شاوخوا ۱۲۰۹۲ ټنه سبزیجات هند، پاکستان او قزاقستان ته صادر شوي، چې ډېره برخه یې هوږه، پیاز او مونګ دي.
 
د صنایعو او سوداګرۍ وزارت ویاند هم ټینګار وکړ چې دغه وزارت هڅه کوي چې د میوو او سبزیجاتو او نورو کرنیزو او باغدارۍ محصولاتو صادرات زیات کړي.
 
هغه زياته کړه، د چيري مېوې د صادراتو په برخه کې يو شمېر اسانتياوې رامنځته شوې، چې له پنجشېر ولايت څخه هند ته د يخچال لرونکې لارۍ په مرسته صادرېږي. همدارنګه له ۳۰ کلونو وروسته له روسیې سره د انارو د صادراتو تړون لاسلیک شو.
 
په همدې حال کې د کندهار ولایت د سوداګرۍ او پانګونې خونې چارواکي وايي، سږ کال له کندهار څخه د څه باندې ۱۵ میلیونه ډالرو په ارزښت انګور صادر شوي دي.
 
د دې خونې مرستيال عبدالباقي بينا د آوا خبريال ته وويل چې که څه هم انګور او انار په کورنيو بازارونو کې ښه پلورل کيږي. خو کندهاري سوداګرو په روان کال کې د څه باندې ۱۵ میلیونه ډالرو په ارزښت دغه مېوه صادره کړې ده.
 
د لیدونکي د څرګندونو پر بنسټ؛ په روان کال کې د کندهار له تاکونو څخه شاوخوا ۳۰ زره ټنه انګور حاصل شوي دي.
 
هغه وويل، انګور او انار د کندهار مهم محصولات دي، چې هر کال هېواد ته ميليونونه ډالره عوايد راوړي.
 
خو يو شمېر کروندګر او بڼوال د خپلو کرنيزو محصولاتو د زېرمه کولو لپاره د معياري سړو خونو د جوړولو غوښتونکي دي او وايي، چې هر کال د سړو خونو د نشتوالي له امله د کروندګرو او باغ لرونکو په زياته اندازه کرنيز محصولات خرابېږي.
 
يو له دغو بزګرانو لعل اغا د آوا خبريال ته وويل چې سرپرست حکومت بايد د معياري سړو خونو جوړولو ته جدي پاملرنه وکړي څو کروندګرو او بڼوالو ته د زيانونو مخه ونيول شي.
 
د هغه د څرګندونو پر بنسټ؛ هر کال باغبان او بزګران د مېوو او سبزیجاتو د ذخیره کولو لپاره د معیاري سړو خونو د نشتوالي له امله ډیر زیانمن کیږي.
 
د تازه مېوو او سبزیجاتو د سوداګرو د اتحادیې مشر اختر محمد احمدي هم ټینګار وکړ، چې د معیاري سړو خونو او نامناسبو بازارونو د نشتوالي له امله د بزګرانو حاصلات په ډېره ټیټه بیه پلورل کېږي.
 
د احمدي د څرګندونو پر بنسټ؛ دلته د سوداګرو شخصي سړې خونې شته، خو دوی یې پخپله ټاکي.
 
په همدې حال کې د صنايعو او سوداګرۍ وزارت وياند وايي، چې اوسمهال په هېواد کې ١٤ معياري او لويې سړې خونې شته او د سلګونو نورو سړو خونو پر جوړولو کار روان دى.
 
هغه وويل، د لومړي وزير د دفتر په حکم، هغه شمېر سړې خونې چې د جمهوريت پر مهال موجودې وې او د ستونزو له امله فعالې نه وې يا نيمې فعالې وې، له سره به رغول کېږي، څو سوداګر او بزګر ترې ګټه پورته کړي.
 
جواد ظریف د روان کال په اوږدو کې د پاکستان په لاره کې د ځینو میوو او سبزیجاتو د خرابیدو په اړه وویل: پاکستان دا کار د ټولو تړونونو او نړیوالې سوداګرۍ او د ترانزیتي قوانینو خلاف عمل کړی او زموږ ملت او ملت دواړه یې زیانمن کړي، موږ هیله من یو چې پاکستان تر څو د هغه ترانزیتي قرارداد پر بنسټ عمل وکړي چې هغه له موږ سره لري.