د جاپان په مرستو کې چې د اړتيا وړ توکي په کې شامل دي، د دغه هېواد د سفير له خوا د کابل په نړيوال هوايي ډګر کې د هرات ولايت د وروستۍ زلزلې له زيانمنو سره د مرستې په موخه افغاني سرې مياشتې ته وسپارل شول.

آوا - کابل: د افغاني سرې میاشتې مطبوعاتي دفتر اعلان کړی چې په دغو توکو کې ۲۹۴۰ کمپلې، ۱۴۸۰ توشکې، ۲۵۰ د اوبو غټ بوتلونه، ۲۱۰ د خیمي، ۲۱ پلاستیکي غالۍ او ۵ د اوبو پاکولو ماشینونه شامل دي.
 
د افغاني سرې مياشتې د عمومي منشي مرستيال مولوي عبداللطيف ثابت د دغو توکو د سپارلو پر مهال وويل چې مرسته شوي توکي به ډېر ژر د هرات زلزله ځپلو کورنيو ته ووېشل شي.