د پنجشیر ولایت سیمه ییز چارواکي وايي، د دریم ځل لپاره یې له ۳۹۳۰ کیراټ څخه زیات د پنجشېر زمرد په ۱۶۵۳۰۰ ډالره د داوطلبۍ له لارې پلورلي دي.

آوا - کابل: د پنجشیر ولایت د اطلاعاتو او کلتور ریاست د اکس په ټولنیزه پاڼه کې لیکلي چې د زمردو دغه اندازه د یوه افغان سوداګر او یوه چینایي سوداګر له خوا پیرودل شوې ده.
 
دغه قیمتي ډبرې په تیرو دوو اونیو کې د پنجشېر د زمردو له اتو کانونو څخه ایستل شوي دي.
 
تر دې مخکې د کانونو او پټرولیم وزارت د پنجشیر له کانونو څخه استخراج شوي زمرد دوه ځلې د داوطلبۍ له لارې پلورلي وو.
 
د یادولو وړ ده چې اسلامي امارت د پنجشیر ولایت په لومړۍ ناحیه کې د زمرد د استخراج چارې د اسد په میاشت کې پیل کړې وې او هغه مهال د کانونو او پټرولیم وزارت اعلان کړی و چې ۲۰۰ د زمرد کان کیندونکو ته یې د کار جوازونه ورکړي دي.
 
د اسلامي امارت د کانونو او پټرولیم وزارت د شمېرو له مخې په پنجشیر کې د زمرد ۷۵۰ کانونه ثبت دي چې ۵۰۰ یې فعال دي.