د خوړو نړیوال پروګرام یو ځل بیا له مرسته کوونکو هېوادونو غوښتي چې په راتلونکي ژمي کې په افغانستان کې له اړو کسانو سره بشري مرستې وکړي.

آوا - کابل: د دغه سازمان افغان څانګې د ایکس ټولنیزې شبکې په یوه بیان کې لیکلي، چې د خوړو نړیوال پروګرام سږ کال د بودیجې له ۶۰ سلنه کمښت سره مخ دی.
 
د دې اعلامیې له مخې افغانستان یو له هغو زیانمنو او مظلومو هېوادونو څخه دی، چې سږکال پکې لس میلیونه اړ کسان له حیاتي مرستو بې برخې شوي دي.
 
په افغانستان کې د دغه سازمان مشر هسیائو وی لی په خپل وروستي ویډیويي پیغام کې په راتلونکي ژمي کې په افغانستان کې د ۲۱ میلیونو اړمنو خلکو لپاره د خوراکي توکو د برابرولو لپاره د یو میلیارد ډالرو مرستې غوښتنه وکړه.
 
په همدې حال کې د شمېرو له مخې په سلو کې ۹۰ افغانان د فقر تر کرښې لاندې ژوند کوي.