د رئیس الوزرا د دفتر رئیس د تکواندو د ملي ټیم له غړو سره چې په جنوبي کوریا کې یې د تکواندو په نړیوالو سیالیو کې ۱۴ مډالونه ګټلي وو، وکتل.

آوا - کابل: د رئیس الوزرا مطبوعاتي دفتر د یوې خبرپاڼې په خپرولو سره ویلي چې د اسلامي امارت د رئیس الوزرا د دفتر عمومي رئیس ملا عبدالواسع د بدني روزنې له عمومي رئیس احمدالله وثیق سره وکتل او سپورت او د تکواندو د ملي ټیم غړو چې په سویلي کوریا کې یې د تکواندو په نړیوالو سیالیو کې برخه اخیستې وه او ۱۴ مډالونه يي کټلي، ستاینلیکونه ورکړ.
 
د رئیس الوزرا د دفتر رئیس ملا عبدالواسع د تکواندو ورزشکارانو ته د دوی د وروستیو لاسته راوړنو له امله مبارکي وویله او د هیواد له ورزشکارانو سره یې د دا ډول غونډو دوام مهم وباله.
 
د بهرنیو چارو وزارت مطبوعاتي دفتر ویلي دي چې د اسلامي امارت په پیژندلو کې د ورزشکارانو رول خورا مهم دی او اسلامي امارت به د خپلو ظرفیتونو په چوکاټ کې د دوی د ټولو ستونزو د حل هڅه وکړي.
 
د بدني روزنې او سپورت عمومي رييس احمدالله وثيق په هېواد کې د بېلابېلو څانګو د ورزشي ټيمونو او لوبغاړو د لاسته راوړنو په اړه معلومات وړاندې کړل او ويې ويل چې زموږ ورزشکاران په بهر کې د افغانستان د پرمختګ او هيلې سفيران او سمبولونه دي.
 
د هغه په ​​وينا، دا مهال د يادې شوې ادارې تر چتر لاندې څه باندې دوه سوه زره ځوانان په بېلابېلو برخو کې په ورزش بوخت دي او د هېواد د تکواندو د ملي لوبډلې لوبغاړو د جنوبي کوريا په وروستيو سياليو کې ١٤ مډالونه ګټلي دي.