د افغانستان د سوداګرۍ او پانګونې خونه وايي، د دغه خونې د یوه پلاوي په مشرۍ ۵۰ افغان سوداګر د جنوبي اسیا او چین د وارداتو او صادراتو په اووم نندارتون کې د ګډون په موخه ورغلي دي.

آوا - کابل: د افغانستان د سوداګرۍ او پانګونې خونې مشر خان محمد سرفراز وايي، د دغه خونې د یوه پلاوي په مشرۍ ۵۰ افغان سوداګرو د جنوبي اسیا او چین د وارداتو او صادراتو په اووم نندارتون کې ګډون کړی و.
 
نوموړي زیاته کړه، چې د دغه کنفرانس د نندارتون په برخه کې شاوخوا ۵۰ افغان سوداګرو د افغاني تولیداتو او تولیداتو د نندارې لپاره ځای نیولی او دغه راز د سوداګرۍ او پانګونې خونې یوه پلاوي هم په دغه کنفرانس او ​​نندارتون کې ګډون کړی دی.
 
دغه راز د رئیس الوزرا د دفتر سياسي مرستيال مولوي عبدالکبير د دغه نندارتون د پرانستلو په مراسمو کې وويل چې د دغه شان نندارتونونو جوړول کولاى شي د سيمې هېوادونه له يو بل سره نږدې کړي.
 
د اسلامي امارت دغه چارواکي چې د دغه نندارتون د پرانېستې په مراسمو کې یې انلاین خبرې کولې، په هېواد کې دننه د بهرنیو پانګوالو لپاره د اسانتیاوو پر رامنځته کولو هم ټینګار وکړ.
 
د رئیس الوزرا د دفتر سياسي مرستيال څرګنده کړه: د دغه شان نندارتونونو جوړول د سيمې هېوادونه له يو بل سره نږدې کولاى شي او شته سوداګريز فرصتونه زيات کړي. حکومتونه د خلکو د اقتصاد د ودې مسولیت لري چې له یو بل سره همکاري وکړي.
 
د رئیس الوزرا د دفتر د سیاسي مرستیال په وینا، اسلامي امارت د چین د یو کمربند او یوې لارې له نوښت سره سم د دواړو لورو ترمنځ په هر اړخیزو همکاریو باور لري او په هېواد کې د بهرنیو پانګوالو لپاره د اسانتیاوو برابرولو ته چمتو دی.
 
مولوي عبدالکبیر ثابت زیاته کړه: د افغانستان او چین ترمنځ اقتصادي او سوداګریزې اړیکې په ښه کچه دي او دواړه لوري د دغو اړیکو د پراختیا لپاره کار کوي.
 
په ورته وخت کې په افغانستان کې د اسلامي امارت له جوړېدو سره چین له افغان حکومت سره ښې اړیکې جوړې کړې دي.