د اسلامي امارت د بهرنیو چارو وزارت وايي، مصري پلاوي او دیپلوماتانو په کابل کې د اسلامي امارت د بهرنیو چارو وزارت له دوهم سیاسي مرستیال سره په کتنه کې د سیاسي، اقتصادي او کلتوري اړیکو پر پراختیا خبرې وکړې.

آوا - کابل: د اسلامی امارت د بهرنیو چارو وزارت مطبوعاتي دفتر نن (سه شنبه، اسد ۱۷) په ټوېټر لیکلي چې د مصري پلاوي مشر حسن عبدالسلام النجار له محمد احمد سره د مصر سفارت لومړي سکرتر او د قونسلګرۍ چارو معین عبدالحلیم په کابل کې د بهرنیو چارو وزارت له دویم سیاسي معین فیضان الله ناصري سره وکتل.
 
په دې کتنه کې د مصري پلاوي مشر په بېلابېلو برخو کې د اسلامي امارت د دوه کلنو لاسته راوړنو په ځانګړي ډول په افغانستان کې د نړیوال امنیت او اقتصادي ثبات د تامین په برخه کې قدرداني وکړه.
 
په دې کتنه کې دواړو لورو د دواړو هېوادونو ترمنځ د سياسي، اقتصادي او فرهنګي په ګډون په بېلابېلو برخو کې د اړيکو د پراختيا پر څرنګوالي بحث او د نظريو تبادله وکړه.