په ملګرو ملتونو کې د روسيې د استازي مرستيال ديميتري پوليانسکي د دغه سازمان د امنيت شورا په غونډه کې د جګړې له امله د رامنځته شوې قحطۍ او خوراکي ناامنيو په اړه وويل، چې امريکا او د هغې متحدين "لويديځ هېوادونه" د لوږې او بې وزلۍ سره مخ کړي دي.

آوا - کابل: په ملګرو ملتونو کې د روسیې د استازی مرستیال دیمیتری پولیانسکی په خپله وینا کې وویل چې د خوراکی توکو ډېر بحرانونه په مستقیم او غیر مستقیم ډول د امریکا او متحدینو د کړنو له امله رامنځته شوی دی.
 
هغه وویل: «د بېلګې په توګه افغانستان چې زموږ انګلیسي همکار یې په اړه نن خبرې کوي، په تېرو شلو کلونو کې د لوږې او بې وزلۍ له کندې څخه د خلاصون هڅه کوي. "دا ټول د امریکا په مشرۍ د ایتلاف د پالیسۍ له امله دي چې هڅه کوي دا هیواد په لویدیځ ډول ډیموکراس کړي، یو داسې هیواد چې د دودیز ژوندانه په کلکه ملاتړ کوي."
 
دیمیتري پولیانسکي ټینګار کړی چې د خوراکي توکو د بحران او نورو بحرانونو اصلي لاملونه د لویدیځ غیرقانوني مداخلې دي.
 
پولینسکي زیاته کړه: که څه هم د امنیت شورا لویدیځ غړي دا جرئت نه لري چې د عراق، لیبیا او سوریې په څیر هیوادونو کې د خوراکي توکو د بحران او نورو بحرانونو اصلي لاملونه په روښانه توګه په ګوته کړي، موږ ټول ښه پوهیږو چې دا بحرانونه د لویدیځ غیرقانوني مداخلې له امله رامنځته شوي دي.
 
بايد يادونه وشي چې د جمهوري رياست په شل کلنه واکمنۍ کې په افغانستان کې په ميليونونو ډالر ولګېدل او په افغانستان کې د امريکا او لويديځو ګوډاګي حکومتونو له خوا هيڅ ډول بنسټيز کار ونه شو.
 
د افغانستان د مرکزي بانک د پیسو په بندولو او د ظالمانه بندیزونو په لګولو سره د امریکا او لویدیځو هیوادونو د اسلامي امارت له بیا پیلیدو وروسته، په دغه هیواد کې د فقر او لوږې بحران لاپسې زیات شوی دی.