د اسلامي امارت د اقتصاد وزارت مسؤلینو د « ملت ته د حکومت د حساب ورکونې » په غونډه کې وویل چې د ۱،۶۴۷ میلیونه ډالرو په ارزښت ۲۲۳۳ پروژې بشپړې شوي او ۱،۳۴۰ نورې تر کار لاندې دي. د دوی په وینا، حکومت هڅه کوي چې د سیمه ییزو او کورنیو ظرفیتونو په کارولو سره د افغانستان اقتصاد وده وکړي.

آوا - کابل: د اقتصاد وزارت مشرتابه په یوه غونډه کې د دغه وزارت د فعالیتونو، لاسته راوړنو او راتلونکو پلانونو یو کلن راپور خلکو ته وړاندې کړ.
 
په دې خبري ناسته کې چې د حکومت د اطلاعاتو او رسنیو په مرکز کې جوړه شوې وه؛ د اقتصاد وزارت مسلکي معین ډاکټر عبداللطیف نظري د "افغانستان د اسلامي امارت د اقتصادي ډیپلوماسۍ" په اړه خبرې وکړې او ویې ویل چې دا دیپلوماسۍ په نړیوالو اړیکو کې د "خپل ځان سره" د نظریې پر بنسټ ولاړه ده.
 
هغه زیاته کړه، اسلامي امارت غواړي او هڅه کوي، چې په هېواد کې له کورنیو او داخلي ظرفیتونو څخه د هېواد د اقتصادي ودې او پرمختګ لپاره کار واخلي.
 
د اقتصاد وزارت مرستیال د صادراتو او وارداتو لپاره د نړیوالو بازارونو په اړه کافي پوهه، د اسلامي امارت د اقتصادي شریکانو لومړیتوب، د هېواد اقتصادي پراختیا او وده، د افغانستان له جغرافیوي موقعیت څخه د ښې او ګټورې استفادې هڅې، د بندیزونو لغوه کول او بې پرې کول د اسلامي امارت د اقتصادي ډیپلوماسۍ د شاخصونو په توګه یاد کړل.
 
عبداللطيف نظري ډيپلوماسي د "اقتصادي ليدلوري" په توګه وبلله چې د اقتصادي سقوط مخه ونيسي، انفلاسيون کنټرول کړي، صادرات زيات کړي، نرخونه راټيټ کړي او په شفاف ډول د عوايدو راټول کړي د اسلامي امارت د اقتصادي ډيپلوماسۍ له شاخصونو څخه چې د اجنډا په سر کې ده.
 
په همدې حال کې د اقتصاد وزارت د غیر دولتي بنسټونو د ادغام رئیس مفتي عبدالسلام اشرفي او د دغه وزارت ویاند عبدالرحمن حبیب د دغه وزارت د فعالیتونو او مهمو لاسته راوړنو په اړه معلومات ورکړل.
 
د دوی په وینا، په تېر کال کې په اقتصاد وزارت کې ۳۷۶ نوي بنسټونه ثبت شوي، چې ۳۵۵ یې کورني او ۲۱ یې بهرنۍ دي.
 
دغه راز د څلورو بهرنیو او ۲۱۲ کورنیو بنسټونو په ګډون ۲۱۶ غیر دولتي بنسټونه د نه فعالیت له امله منحل شوي دي.
 
د اقتصاد وزارت د چارواکو د معلوماتو له مخې؛ د یو میلیارد او ۶۴۷ میلیونو ډالرو په ارزښت دغه وزارت ته د ۳۵۷۳ پروژو د تطبیق پلان د بنسټونو او اطلاعاتو د واحدې بودیجې له لارې راپور شوی، چې له دې جملې څخه ۲۲۳۳ پروژې بشپړې شوي او ۱۳۴۰ پروژې تر کار لاندې دي.
 
دا پروژې د روغتیا، پوهنې، کرنې او اوبو لګولو، ټولنیز امنیت، زیربناوو او له ترهګرۍ سره د مبارزې په برخو کې دي.
 
د يادونې وړ ده، چې اوسمهال په ټول هېواد کې ٢٣٩٣ نادولتي موسسې شتون لري، چې ٢٧٢ يې بهرنۍ او ٢١٢١ يې کورني دي. دا د اقتصاد په وزارت کې ثبت شوی دی.