د هرات والي په هرات کې د ايران د سوداګريزو فرصتونو له نندارتون څخه ليدنه وکړه او د دغه شان نندارتونونو جوړول يې د ايران او افغانستان ترمنځ د سوداګريزو اړيکو د پياوړتيا لپاره مهم وبلل.

آوا - هرات: د هرات والي مولوي نوراحمد اسلامجر په هرات کې د ایران د سوداګریزو فرصتونو له نندارتون څخه د لیدنې پر مهال دغه ډول نندارتونونه د ایران او افغانستان ترمنځ د سوداګریزو اړیکو د پیاوړتیا لپاره مهم وبلل.
 
د هرات والي د دغه نندارتون له ګډونوالو وغوښتل چې له خصوصي سکتور سره په همغږۍ د تولیداتو په برخه کې پانګونه وکړي.
 
نوموړي دغه راز ډاډ ورکړ، چې سيمه ييزه اداره به د کورنيو او بهرنيو پانګوالو لپاره د لا زياتو اسانتياوو په برابرولو کې هېڅ ډول هڅې ونه سپموي.
 
په همدې حال کې د دغه نندارتون ګډونوالو د دغه نندارتون د جوړولو لپاره د سيمه ييزې ادارې له خوا د اسانتياوو د رامنځته کولو هرکلى وکړ او په هرات کې يې د توليداتو په برخه کې د پانګونې په برخه کې د پانګونې لېوالتيا څرګنده کړه.
 
د يادونې وړ ده چې په دغه نندارتون کې د شلو ايراني شرکتونو محصولات د څلورو ورځو لپاره د مينه والو لپاره نندارې ته وړاندې شوي وو.