په اسلام آباد کې د افغانستان سفارت وايي، چې د افغانستان، پاکستان او ازبکستان د چارواکو ترمنځ د ټرانس-افغان اورګاډي د پټلۍ د غځولو تړون لاسلیک شو.

آوا - کابل: په اسلام آباد کې د اسلامي امارت سفارت د یوې خبرپاڼې په خپرولو سره ویلي چې د ازبکستان، پاکستان او افغانستان ترمنځ د ټرانس-افغان اورګاډي د پټلۍ د جوړولو تفاهم لیک په اسلام آباد کې لاسلیک شو.
 
په اسلام آباد کې د افغانستان سفارت وايي، چې دغه تفاهم ليک د سرطان د مياشتې په ٢٧ مه نېټه د دواړو هېوادونو د استازو او د اسلامي امارت د استازو ترمنځ لاسليک شو.
 
د سفارت په ټویټ کې راغلي: "په اسلام آباد کې د افغانستان سفارت اعلان کوي ​​چې د ۲۰۲۳ کال د جولای په ۱۸مه د افغانستان، پاکستان او ازبکستان ترمنځ د اورګاډي پټلۍ د جوړولو لپاره د تفاهم لیک په رسمي ډول لاسلیک شو."
 
د دې پټلۍ د اوږدوالي او د جوړولو د لګښت په اړه تر اوسه نور جزئیات نه دي ورکړل شوي.
 
له بلې خوا د اسلامي امارت ویاند ذبیح الله مجاهد په یوه ټوېټ کې ویلي، چې د ازبکستان، افغانستان او پاکستان تر منځ د ټرانس افغان اورګاډي پټلۍ به د پکتیا له خرسو سیمې وروسته د ازبکستان له لارې بلخ ته له پاکستان سره ونښلوي.
 
د اسلامي امارت ویاند د افغانستان د ترانزیټ پټلۍ پروژه یوه مهمه اقتصادي لار بللې ده.
 
د یادولو وړ ده چې تر دې وړاندې د اسلامي امارت د ریل پټلۍ عمومي رئیس ملا بخت الرحمن شرافت په اسلام آباد کې د افغانستان، پاکستان او ازبکستان د ریل پټلۍ د مسوولینو ترمنځ په درې اړخیزه ناسته کې د دغه پټلۍ د عملي کار پر پیل ټینګار کړی و.