آوا: دواړو لورو د امنیت او ثبات د ټینګښت، د پانګونې د فرصتونو، روغتیا او پوهنې او د دواړو هېوادونو ترمنځ د اړیکو پر ښه والي خبرې کړې دي.

 

په دې کتنه کې ښاغلي متقي له دغه هېواد څخه وغوښتل چې له کابل سره د هراړخیزو اړیکو د ټینګولو لپاره په جدیت سره ودرېږي.

 

د افغانستان د بهرنیو چارو د وزارت د ویاند مرستیال ضیا احمد تکل په دې اړه وايي: "بریتانیا باید له کابل سره په اعتماد او زړورتیا خبرې وکړي."

 

تکل د ښاغلي متقي په حواله وویل: "اسلامي امارت یو ولسي حرکت دی او د حکومت د تعامل او واک پالیسي لري." د اسلامي امارت د حل لاره باید د رسنیو د راپورونو پراساس نه، بلکې د متقابل احترام، حقیقت او رښتینولۍ په نظر کې نیولو سره غوره شي.

 

د بهرنیو چارو وزارت په افغانستان کې د برتانیې د شارژدافیر له قوله ویلي چې په افغانستان کې د امنیت او ثبات د ټینګښت په برخه کې د اسلامي امارت ژمنې د پوهیدو وړ دي او د نشه یي توکو د مخنیوي لپاره پورته شوي ګامونه اغیزمن دي.

 

د ۲۰۲۱ کال په اګست میاشت کې په هېواد کې له سیاسي تحولاتو وروسته په کابل کې د بریتانیا سفارت وتړل شو او اوس مهال د دغه هېواد یو استازی په دوحه کې د افغانستان لپاره د شارژدافیر په کچه کار کوي.

 

بريتانيا اوسمهال سرپرست حکومت په رسميت نه پېژني او په لندن کې د افغانستان د سفارت سفير او کارکوونکي چې د تېر حکومت له خوا ټاکل شوي وو، اوس هم په کار بوخت دي.

 

دغه راز رابرټ ډيکسن د لوړو زده کړو وزارت له سرپرست ندا محمد ندیم سره هم وکتل.

 

د لوړو زده کړو وزارت په خپله ټویټر پاڼه لیکلي چې ښاغلي ندیم په افغانستان کې د ښوونې او روزنې د ودې او پراختیا په برخه کې د نړۍ د هېوادونو د همکارۍ غوښتنه کړې ده.