په افغانستان کې د ملګرو ملتونو د ماشومانو وجهي صندوق (یونیسف) دفتر وايي، دغه سازمان د ۲۰۲۳ کال په لومړیو دریو میاشتو کې د افغانستان په ۹ ولایتونو کې له ۶۷۵ روغتیايي مرکزونو سره مرسته کړې ده.

آوا - کابل: په افغانستان کې د ملګرو ملتونو د ماشومانو وجهي صندوق (یونیسف) نن (دوشنبه، جوزا ۲۹) په ټویټر کې لیکلي چې د اسیا پراختیايي بانک په همکارۍ یې له دغو مرکزونو سره مرسته کړې ده.

په افغانستان کې د ملګرو ملتونو د ماشومانو وجهي صندوق دا نه ده څرګنده کړې چې دغه روغتیايي مرکزونه د افغانستان په کومو ولایتونو کې دي.

یونیسف ویلي، چې له دې ملاتړ سره تر پنځو میلیونو ډېر کسان له "کیفیته" روغتیايي خدمتونو برخمن شوي دي.

د يادونې وړ ده، چې د روغتيايي مرکزونو نشتوالى، د درملو او خدمتونو ټيټ کيفيت په هېواد کې روغتيايي خدمتونو ته د خلکو د لاسرسي پر وړاندې له عمده ننګونو څخه دي.