په ریاض کې د ایران د اسلامي جمهوریت د سفارت له پرانستلو وروسته د امریکا د بهرنیو چارو وزیر انتوني بلینکن په یوه ناڅاپي سفر سعودي عربستان ته ولاړ او په جده کې یې له ولیعهد محمد بن سلمان سره وکتل. ویل شوي چې د خبرو تمرکز د سعودي عربستان او اسراییلو ترمنځ د اړیکو د عادي کولو لپاره د امریکا هڅې او د سعودي عربستان د بشري حقونو د درناوي په اړه خبرې دي.

آوا: د امریکا د بهرنیو چارو وزیر انتوني بلینکن جدې ته د خپل سفر په لومړۍ ورځ د سعودي عربستان له ولیعهد محمد بن سلمان سره وکتل او د بشري حقونو، د ریاض او اسرائیلو ترمنځ د اړیکو د عادي کیدو او د سوډان جګړې په اړه یې خبرې اترې وکړې.
 
یورونیوز، د یوه امریکايي چارواکي په حواله لیکلي چې "دواړو خواوو خلاصې او صادقانه خبرې وکړې" او بلنکن د محمد بن سلمان سره "په عمومي ډول او د ځانګړو مسلو په اړه" د بشري حقونو مسله راپورته کړه. په دې کتنه کې د دواړو هېوادونو ترمنځ د دوه اړخیزو اړیکو د ټینګښت او د اختلافي مسایلو په اړه خبرې وشوې.
 
د دغه امریکايي چارواکي په وینا، دواړو لورو له اسرائیلو سره د اړیکو د عادي کولو پر ظرفیت خبرې وکړې او په دې برخه کې یې د خبرو پر دوام هوکړه وکړه.
 
سعودي عربستان ته د امریکا د بهرنیو چارو د وزیر سفر په داسې حال کې کیږي چې پرون په سعودي عربستان کې د ایران د اسلامي جمهوریت سفارت او سیاسي ماموریت له اوو کلونو وروسته بیرته پرانیستل شو.
 
دا په داسې حال کې ده چې په تېرو څلورو کلونو کې د سعودي د کوماندو د انتقاد کوونکي جمال خاشقجي له بې رحمانه وژنې او همدارنګه د یمن په جګړه کې له سعودي عربستان سره د امریکا د ملاتړ د نشتوالي له امله د دواړو هېوادونو اړیکې سړې شوې دي. . د ایران او سعودي عربستان تر منځ هغه توافق چې د چین په منځګړیتوب لاسلیک شو، د امریکا لپاره یوه بله ماتې او له خپل مهم متحد، امریکا څخه د سعودي عربستان واټن ګڼل کیږي.