د اسلامي امارت د لوړو زده کړو وزارت سرپرست ندا محمد ندیم په کابل کې د پاکستان له سفیر سره په کتنه کې له اسلام آباد سره د اړیکو پر ټینګښت د ټینګار ترڅنګ وویل، بهرني هېوادونه باید د بشري حقونو په پلمه د افغانستان په کورنیو چارو کې له لاسوهنې ډډه وکړي.

آوا - کابل: د اسلامی امارت د لوړو زده کړو وزارت څخه په خپره شوې خبرپاڼه کې راغلی چې د دغه وزارت سرپرست ندا محمد ندیم په کابل کې د پاکستان له سفیر عبیدالرحمن نظامی سره وکتل او خبرې یې ورسره وکړې.
 
په دې کتنه کې ندا ​​محمد ندیم د پاکستان او افغانستان پر اړتیا ټینګار وکړ چې یو بل ته درناوی وکړي او اړیکې پیاوړې کړي.
 
د لوړو زده کړو وزارت سرپرست د بهرنیو هېوادونو مداخلو ته په اشارې سره زیاته کړه، چې د بشري حقونو اوسني مدافعین هڅه کوي د بشري حقونو په نوم د افغانستان په کورنیو چارو کې لاسوهنه وکړي.
  
د اسلامي امارت دغه چارواکي زیاته کړه چې د افغانستان خلک په یوه دودیزه ټولنه کې ژوند کوي او اسلامي امارت هیچا ته اجازه نه ورکوي چې د افغانانو پر کلتور او عنعناتو نیوکې وکړي.
 
د ندا محمد ندیم په خبره، د بشري حقونو مدافعینو د تېرو حکومتونو ظلمونه او جنایتونه له پامه غورځولي او اوس د بشري حقونو په بېلابېلو پلمو د افغانستان په کورنیو چارو کې لاسوهنه کوي.
 
د لوړو زده کړو سرپرست وزیر د کوم ځانګړي هیواد یا ادارې نوم وانخیست او نه یې هم څرګنده کړه چې کوم هیوادونه په نښه کوي.
 
خو د لوړو زده کړو وزارت مرستیال لطف الله خیرخواه په پاکستان کې افغان محصلینو ته د ویزو د ورکولو مسئله راپورته کړه او له پاکستانه یې هم وغوښتل چې په تعلیمي روغتونونو کې د استادانو او په تعلیمي ادارو کې د ساینسي کارکوونکو په روزلو کې مرسته وکړي.
 
په کابل کې د پاکستان سفیر همداراز وویل چې افغانستان او پاکستان دوه دوست هیوادونه دي چې مذهبي او کلتوري مشترکات لري.