د فاریاب سیمه ییز چارواکي وايي، د ۴۰ میلیونه افغانیو په لګښت د دوو پروژو د جوړېدو چارې پرون (چهارشنبه، ثور ۶) د کرنې، مالدارۍ او اوبو لګولو د سرپرست وزیر په حضور کې د دغه ولایت په اندخوی ولسوالۍ کې پرانیستل شوې.

آوا - مزار شریف: د فاریاب د سیمه ییزو چارواکو د معلوماتو له مخې، د اندخوی له مرکزی چوک څخه ۶۰۰ متره لیرې د سید جمال الدین افغان سړک پر سر یو چوک د یما پټرول شرکت له خوا جوړیږی. "د شل میلیونه افغانیو په لګښت، دا پروژه به درې میاشتې وخت ونیسي.
 
په ورته وخت کې په اندخوی ولسوالۍ کې د "دارالعلوم عمري" د ودانۍ د بنسټ ډبره هم کېښودل شوه او د دغې پروژې پر جوړېدو هم شل میلیونه افغانۍ لګښت راځي.
 
د کرنې او اوبو لګولو وزارت سرپرست عطاالله عمري د دغه دارالعلوم د پرانېستې پر مهال وویل: دغه دارالعلوم په ۶۵۰ متره مربع ځمکه کې په درېیو ودانیو کې په عصري بڼه جوړېږي. هغه زياته کړه، د دغه دارالعلوم لاندې پوړ د اوسېدو خونې په بڼه، دويم پوړ يې ٨ درسي خونې او درېيم پوړ يې ليليه ده، چې ١٨ خونې، تشنابونه او نورې اسانتياوې لري.
 
عمري زياته کړه، چې د دارالعلوم په پنځه جريبه ځمکه کې موقعيت لري، چې دوه يې د ده د پلار وقف ځمکه ده او پاتې درې جريبه ځمکه يې پخپله اخيستې ده.
 
د هغه په ​​وينا، د دغه دارالعلوم پر جوړېدو څه باندې شل ميليونه افغانۍ لګښت راځي، چې د دولتي چارواکو، مخورو او هم له خپلو شخصي منابعو څخه ورکول کېږي.