سیاسي کارپوهان وايي چې له هېواده بهر د سیاسي ګوندونو په جوړولو کې د نړۍ د ځینو هېوادونو استخباراتي کړۍ لاس لري، ځکه دغه هېوادونه غواړي په افغانستان کې د خپلو هیلو د ترلاسه کولو لپاره د سیاسي ګوندونو په جوړولو سره پر اسلامي امارت فشار راوړي.

آوا - کابل: د سیاسي چارو کارپوهان دا څرګندونې په داسې حال کې کوي، چې په افغانستان کې د اسلامي امارت له جوړیدو وروسته په بهر کې د سیاستوالو له خوا څو نوي سیاسي جریانونه رامنځ ته شوي دي.
 
د سیاسي چارو کارپوه محمد اصف براتي له آوا سره په مرکه کې ویلي، چې د نړۍ د ځینو هېوادونو استخباراتي کړۍ په بهر کې د سیاسي ګوندونو په جوړولو کې لاس لري، ځکه دغه هېوادونه غواړي د سیاسي ګوندونو په جوړولو سره پر اسلامي امارت فشار راوړي.
 
هغه زیاته کړه، له هېواده بهر د سیاسي ګوندونو جوړول د افغانستان د سیاسي، امنیتي او اقتصادي وضعیت په ښه کولو کې هېڅ اغېز نه لري، بلکې دا کار د ځینو هېوادونو د استخباراتي کړیو د نفوذ زمینه برابروي.
 
دغه سیاسي کارپوه ټینګار وکړ: له هیواده بهر ځینو کسانو هڅه کړې چې یو سیاسي ګوند جوړ کړي، دوی له تېرو شلو کلونو راهیسې په واک کې دي، خو د افغانستان د پرمختګ لپاره یې لږ ګټور کار نه دی کړی.
 
د براتي په وينا، هغو کسانو چې په لويديځو هېوادونو کې يې د سياسي ګوند د جوړولو هڅې کړې دي، په افغاني ټولنه کې کوم ټولنيز حيثيت نه لري.
 
په همدې حال کې پخوانی ډیپلومات او د سیاسي چارو پوه عزیز معراج له آوا سره په مرکه کې ویلي چې د نړۍ ځینې هېوادونه خپلې ګټې د افغانستان له جګړې سره تړلي دي. له همدې امله دوی د خپلو هیلو د لاسته راوړلو لپاره په خپلو ګوتو سره سیاسي ګوندونه جوړوي.
 
ښاغلي معراج څرګنده کړه: ګوند چې په هېواد کې دننه د یوه واضح منشور او د یوې مشخصې مالي څانګې پر بنسټ جوړ شوی، د خلکو ملاتړ ته اړتیا لري. خو معلومه نه ده چې څومره خلک له کوم ځای څخه مالي ملاتړ ترلاسه کوي او په نورو هېوادونو کې ګوند جوړوي، په ټولنه به هېڅ ډول مثبت اغېز ونه کړي.
 
دغه پخواني ديپلومات وويل: هغه کسان چې په لويديځو هېوادونو کې يې سياسي جريان رامنځته کړى، له فکري پلوه د افغانستان په اتباعو کې ځاى نه لري.
 
داسلامي امارت دبهرنيو چارو وزير مولوي اميرخان متقي څه موده وړاندې په بهر کې دځينو سياسي شخصيتونو له خوا دسياسي جريانونو او ګوندونو دجوړولو په غبرګون کې وويل: هغه څوک چې له افغانستانه بهر تنظیمونه او اتحادونه کوي، د پنځو روپیو د ترلاسه کولو لپاره یې په غېږ کې د غلامۍ زنګ وهلی دی.
 
متقي دغو سیاستوالو ته ویلي چې افغانستان ته ستانه شي او په خپل هېواد کې په "عزت" سره ژوند وکړي.
 
دا په داسې حال کې ده چې په افغانستان کې د اسلامي امارت له جوړېدو وروسته د پخواني ولسمشر د لومړي مرستیال سرور دانش په مشرۍ د افغانستان د عدالت او آزادۍ ګوند او د بهرنیو چارو د وزیر حنیف اتمر په مشرۍ د «ملي سولې او عدالت غورځنګ» په نومونو جوړ شوی دی. تېر حکومت او د تېر حکومت د ملي امنیت د رئیس رحمت الله نبیل په مشرۍ د افغانستان د ملي ازادۍ ګوند له هېواده بهر خپل موجودیت اعلان کړ.