د بلخ د پوهنې رییس وايي، د پوهنې وزارت د حکم له مخې به د بلخ ولایت پر زده کوونکو ۲ میلیونه او ۴۶۵ زره ټوکه درسي کتابونه ووېشل شو. د دغه ځايي چارواکي په وينا، دغه کتابونه له لومړي څخه تر دوولسم ټولګي پورې دي او په فارسي، پښتو او ازبکي ژبو دي.

آوا - مزارشریف: د بلخ ولایت د پوهنې رییس مولوی عبدالجلیل شهید خیل د آوا له خبریال سره په مرکه کې د دغه ریاست د ښوونیزو فعالیتونو او اقداماتو په اړه وویل: په روان تعلیمی کال کې د پوهنې وزارت د ۱۴۰۲ کال د فرمان له مخې د بلخ ولایت پر زده کوونکو د ۲ میلیونه او ۴۶۵ افغانیو په ارزښت زرګونه ټوکه درسي کتابونه چې په فارسي، پښتو او ازبکي ژبو دي له لومړي څخه تر دوولسم ټولګي پورې پوښلي دي.
 
ده په دوام وويل: په بلخ ولايت کې د ترسره شويو سروې ګانو له مخې د ٤٨٣ تنو ښوونکو کمبود شتون لري او د دغه شمير ښوونکو د ازموينې او استخدام بهير بشپړ شوى دى.
 
نوموړي د ښوونځيو د زده کوونکو د يونيفورم په اړه هم وويل: د خصوصي ښوونځيو د زده کوونکو يونيفورم به د پخوا په څېر وي، ځکه د خلکو او خصوصي ښوونځيو اقتصادي وضعيت ښه نه دى.
 
مولوي شهید خیل په بلخ ولایت کې په تیرو وختونو کې د ښوونکو او خیالي ښوونځيو ته په اشارې سره وویل: دې ته په پام سره چې په تیر حکومت کې فساد او رشوت شتون درلود؛ له همدې امله د خیالي ښوونځیو د ښوونکو معاشونه او لګښتونه د افسوس خبره وه، خو د سلام امارت په اغېزمنتیا سره دا بهیر پای ته ورسېد او په ډاډ سره ویلای شم چې په بلخ ولایت کې خیالي ښوونکي او ښوونځي نشته.
 
هغه زياته کړه، د بلخ ولايت په ټولو سيمو کې د علماوو، قومي مخورو او د پوهنې د مسئولينو له خوا په ښوونځيو کې د خپلو ماشومانو د شاملولو لپاره د خلکو د هڅونې ميکانيزم په جدي توګه تعقيبېږي، څو هېڅ ماشوم او تنکي ځوان له زده کړو بې برخې پاتې نه شي.
 
د يادونې وړ ده، چې د نوي تعليمي کال له پيل سره په څو اونيو کې به ښوونځي د نارينه زده کوونکو پر مخ پرانيستل شي. که څه هم تر اوسه د نجونو د زده کړې خبر نه دی ورکړل شوی.