آوا - کابل: د پاسپورت ریاست عمومی رئیس مولوی عبدالکریم حسیب نن (پنجشنبه، کب ۴) د حکومت د اطلاعاتو او رسنیو په مرکز کې په یوه خبری ناسته کې وویل: د اسلامی امارت تګلاره د اسانتیاوو د برابرولو او د هېوادوالو د ستونزو د هواري په موخه د همدې تګلارې پر بنسټ هڅه مو وکړه چې د روان کال د کب میاشتې له لسمې نېټې څخه د هېواد په مرکز او ولایتونو کې د پاسپورټونو د وېش بهیر پیل کړو.

 

د پاسپورت عمومي رئیس زیاته کړه، په تېر یوه کال کې له فساد سره د مبارزې، د جعل کارۍ د مخنیوي په برخه کې جدي هڅې شوي او په تېرو شپږو میاشتو کې د فساد سره د مبارزې د کمېسیون له خوا ۱۵۰ کسان د فساد په تور نیول شوي او محکمې ته استول شوي دي.

 

عبدالکریم حسیب دغه راز زیاته کړه، چې د پاسپورټونو د وېش بهیر بند شوی، خو دغه ریاست محصلینو، ناروغانو، سوداګرو او د حج او عمرې په حاجیانو پاسپورټونه وېشلي دي.

 

د دې ادارې مسوولین زیاتوي، چې د چټکو، شفافو او د ډاډ وړ خدمتونو د وړاندې کولو په موخه یې د دې ادارې مرکزي او ولایتي دفترونه بشپړ او مجهز کړي دي.

 

د پاسپورت ریاست مسوولین وايي، چې د افغان پوستې له شرکت سره د تفاهم لیک په لاسلیکولو سره په مرکزي دفتر کې د تذکرې د تصدیق دفتر جوړول، د انلاین فورمې جوړول، د الکترونیکي بانکدارۍ د تعرفې سیستم جوړول، د دغه سیستم پراختیا او پیاوړتیا او د مراجعینو د تنظیم او د اسنادو د پروسې په ترڅ کې هېوادوالو ته لازمې اسانتیاوې برابرې شوې دي.

 

د روان کال په میزان مياشت کې د پاسپورټونو د وېش عادي بهير د تخنيکي ستونزو له امله ودرول شو.

 

باید وویل شي، چې د پاسپورټونو د وېش بهیر ځنډېدلو افغانانو ته له ګڼو ستونزو سره مخ کړي دي.