آوا - په نیمروز کې د کرونا واکسین کمپاین پیل شو

د نیمروز ولایت د عامې روغتیا ریاست چارواکي په دغه ولایت کې د کرونا ضد واکسین کمپاین د پیلېدو خبر ورکوي. د دوی په وینا، د کمپاین په دې پړاو کې به ۶۷ زره کسانو ته د کرونا واکسین ورکړل شي.

آوا - هرات: د نیمروز ولایت د عامې روغتیا رئیس ملا عبدالرحمن عبدالله وايي، د دغه ولایت ۶۷ زره هغه ښاریان چې عمرونه یې له ۱۸ کالو پورته دي، د کرونا ضد واکسین کېږي.

دغه راز هغه د نيمروز ولايت د ښاريانو د روغتيا لپاره د کرونا واکسين ډېر مهم وباله او له هغوى يې وغوښتل چې د واکسين په تطبيق کې د عامې روغتيا رياست له ګرځنده ټيمونو سره همکاري وکړي.

همدارنګه د دغه ولایت د عامې روغتیا د معافیت رئیس حافظ مطیع الله منيب وايي: د کرونا واکسین کمپاین د دلوې په ۲۷ مه پیل شوی او د روان کال د دلوې تر ۱۶مې به دوام وکړي.

هغه څرګنده کړه: هغه کسان چې مخکې یې د کورونا واکسین اخیستی هم کولای شي په دې موده کې واکسین ترلاسه کړي.

ویل کېږي چې له څو ورځو راهیسې د هېواد په ډېرو ولایتونو کې د کرونا ناروغۍ د مخنیوي په موخه د واکسین کمپاین پیل شوی او ټاکل شوې چې زرګونه کسان دغه واکسین واخلي.